Sërigne bi noo ngi deeti gnaan
Fàqiir dafay nangoo dagaan
Nangul nu lépp lu nu gnaan
Ndax Yàlla naatal xarnu bi.
Noo ngi dagaan nak ci Mustafaa
Mi nekk marwata ak safaa
Ak aqi Amdi Mustafaa
Mi Yàlla jébbal xarnu bi.
Ak àqi mbooleem ay rakkam
Ak àqi seen baay ya gnu am
Ak àqi Séex yi Bamba am
Ndax Yàlla naatal xarnu bi.
Mbooleem murid yépp a ngi tuub
Tey réccu bàkkaar yi gnu juug
Ba lu nu bay-bay du nu goob
Serigne bi geesul xarnu bi.
Mbàkké dangay boroomi mboot
Te sag njaboot tawat di lott
gnu def ma ab àntalpareet
May làppto ak xarnu bi.
Awma màqaamam di la woo
Waaye Murid yi gnoo ma wax
Ne tawatal te bul nu woo
Saw làmmign ay woy xarnu bi.
Tey jii ma wax ba ne tareet
Ngi yaa ma def àntalpareet
Yaa fab i xam-xam ne yuréet
Ci sama xel ci xarnu bi.
Te bu ma tanqamlu ci gnaan
Ngir lii ma bon, tey ku ko gnaan,
Murid yi yéppa la ko gnaan
Ngir bëgg nga dekkal xarnu bi.
Jooyi perantal lanu jooy
Boo nu fabul lée nu ne wooy
Ku nu yafal bagn def i kuuy
Mu dellu naatal xarnu bi.
Gisu nu Yaay te noo ngi raam
Ku gnakk yaay day nàmp maam
Buural te boot nu ngalla daam
Rogganti mbootum xarnu bi.
